|
ONLINE : 1 |
| SEKAPUR SIRIH |
|
Kapado niniak-mamak nan gadang basa batuah, pucuak bulek jo urek tunggang, nan dianjuang diamba gadang. Kapai tampek batanyo, kapulang tampek babarito. Nan bak umpamo kayu gadang ditangah koto. Urek nan buliah tampek baselo, batang gadang tampek basanda. Dahan kuat buliah bagantuang, daun rimbun buliah balinduang, buah labek dapek dimakan. Tampek balinduang kapanasan, tampek bataduah kahujanan. Nan bakato bana. Aia janiah sayaknyo landai, ikan jinak hukumnyo adia.
Kaampek suku di nagari, nan manjunjuang soko adat, bila maulana jo tuangku, nan tahu di hala dengan haram, sarato sah jo nan bata, suluah bendang adat limbago. Hulu balang jo ampang limo, jo manti pagawai adat, nan bak umpamo pagaran kokoh. Cadiak jo tahu pandai, nan arih bijaksano, tahu diangin nan basuruik, tahu di ombak nan basabuang, sarato dahan ka maimpok, runciang ka mancucuak, tahu di alamat kato sampai, alun bakiek lah bakalam, bulan lah sangkap tigo puluah, takilek ikan dalam aia ikan takilek jalo tibo, tantu jantan batinonyo. Sarato jo urang banyak, nan tidak baimbau namo, sarato basabuik gala, nan dilingkuang barih jo balabeh, di dalam cupak jo gantang, dikanduang adat jo pusako. Ujuik tujuan buah rundiang sakira paham dikandaki, bahubuang jo maso nan ditampuah, musim nan tumbuah iko kini, syariat ado bahakikat. Lahia kulik manganduang isi. Lahia manjadi buah ama, dek enggeran soko nan tatagak. Koto aman alam santoso, salamat koroang jo kampuang, nan aman anak kamanakan. Dunia buliah akhirat dapek, sinan mardeko mangkonyo panuah. Tantang carian jo paparan, bukan ma unjuak ma ajari. Hanyo sakadar calak ganti asah. Kok salah mintak dibatuakan, kok panjang mintak dikarek, senteang mintak dibilai, kok kurang mintak ditukuak. Karano ilimu di Allah tasimpannyo. Kito nan bukan cadiak pandai. |
| BANDUNG 2008 |
|
1448